اكتر 5 حاجات محتاج تعرفها قبل ما تشتري باور بانك

!بتتصرف ازاي لما تليفونك يفصل وانت ماشي؟ موقف وحش،مش كدة؟؟؟

التليفونات ليها سعات بطارية مختلفة،  وبعضها له نظام تشغيل بيوفر في الطاقة وبعضها لا، لكن في الآخر، كل البطاريات حتفصل شحن مهما عملت،بس كل ده مش حيحصل لو كان معاك  باور بانك . ببساطة ، الباور بانك هو بطارية احتياطية معاك طول الوقت، تكفي لشحن موبايلك وموبايلات تانية اكتر من مرة وفي اي وقت.

والهدف من المقال ده هو مساعدتك في اختيار الباور بانك المناسب، لان طبعًا السوق مليان منتجات في منها المميز وفي منها اللي مش قد كدة.

سعة بطارية التليفون

تقدر بسهولة تعرف سعة بطارية موبايلك من مواصفات الموبايل على الانترنت. ومع مراعاة حساب السعة الفعلية للباور بانك، فتقدر تحسب انت محتاج سعة باور بانك قد ايه لشحن الموبايل اكتر من مرة.

وبشكل عام بنفضل للموبايلات اللي بطاريتها اكتر من 4000 مللي امبير / ساعة ان سعة الباور بانك تكون 15000 او 20000 مللي امبير في الساعة، ده طبعًا في حالة عدم التنقل الكتير بالباور بانك، لان كلما زادت السعة كلما زاد حجم الباور بانك.

الشركة المصنعة للباور بانك

بعض الشركات ليها سمعة اكتر من غيرها في تصنيع الباور بانك، والسبب ببساطة انها بتعتمد على بطاريات بكفاءة اعلى ودوائر كهربائية ومخارج ومداخل اعلى في الجودة، وعشان كدة الباور بانك بيعيش اكتر وبيشتغل بكفاءة اعلى.

الكابلات المدمجة

معظم موديلات الباور بانك بتكون من غير كابلات مدمجة، وده بيخليك تحتفظ بكابل شحن طول الوقت، لكن بعض الموديلات بتكون فيها كابلات مدمجة في الجهاز وتنفع تشحن تقريبًا كل الاجهزة، وعشان كدة ممكن سعرها يكون اغلى، لكن بتوفر راحة اكتر بكتير للمستخدم.

السعر والمواصفات والجودة

شركات كتير بتحاول تقلل في التكلفة عن طريق الاعتماد على بطاريات اقل في الجودة، ودوائر اقل، واحيانًا بطاريات معاد تصنيعها، وده طبعًا بيأثر على جودة الاداء وعلى العمر الافتراضي، عشان كدة النصيحة هي الشراء من المصادر الموثوقة فقط، مع اعتبار السعر مقابل الجودة، ومش السعر بس

حجم الباور بانك

بالتأكيد حجم الباور بانك من اهم عوامل الشراء، فلو بتتحرك كتير فانت محتاج باور بانك تحطه في جيبك يكون وزنه قليل وحجمه مش مزعج، وطبعًأ لو الحركة قليلة، ومحتاجه اثناء الشغل على مكتب او في البيت، ففي الحالة دي ممكن تتنازل عن الحجم مقابل انك تستخدم باور بانك بسعة اعلى