شحن

المدة

المدة بتبدأ من تأكيد الطلب، او من الدفع لو دفعت أونلاين. وكل المدد بأيام العمل، يعني الاجازات الرسمية والأعياد مش بتتحسب.

المدد دي تقريبية، ومش بنقدر نحدد يوم بعينه للتسليم. فلو عايز المنتج يوصل قبل مناسبة معينة، اطلبه قبلها بأسبوع.

تأكيد الطلب

لو اخترت الدفع عند الاستلام، بنتواصل معاك خلال 24 ساعة عمل من طلبك، بمكالمة او رسالة واتساب، عشان نأكد الطلب والعنوان. ده بيضمن ان الطلب ليك فعلا، وان المندوب مايروحش على الفاضي.

ولو حاولنا نوصلك 3 مرات ومعرفناش، الطلب بيتلغي تلقائيا. ولو كلمتنا بعد كده، بنعملهولك تاني عادي.

أما لو دفعت أونلاين، فطلبك متأكد بالدفع، وبيتجهز ويتشحن على طول. ولو احتجنا نكلمك في حاجة ومعرفناش نوصلك، مش بنلغي الطلب، بنستناك تتواصل معانا.

مصاريف الشحن

• مجاني للطلبات فوق 1000 جنيه.
• أقل من كده المصاريف بتختلف حسب المحافظة، وبتظهرلك قبل ما تأكد الطلب. مفيش أي رسوم بتتضاف في الآخر.

طرق الدفع

• الدفع عند الاستلام.
• الدفع أونلاين بالكارت أو المحفظة.
• التقسيط على البنوك، وvalU، وأمان.
• منتجات تذكار بتتدفع مقدم، لأنها بتتعمل مخصوص.

الاستلام

افتح الشحنة وشوف المنتج قدام المندوب قبل ما تستلم. ولو فيه أي مشكلة في الشكل أو المحتوى، ارفض الاستلام وكلمنا على طول، ومش هتتحمل أي تكلفة.

ولو الطلب اترفض من غير سبب، او المندوب مالقاش حد أكتر من مرة، ممكن الدفع عند الاستلام مايبقاش متاح في طلباتك الجاية، وتدفع أونلاين بس. وده بيرجع تاني بعد ما تتواصل معانا لتوضيح اسباب عدم الاستلام للطلبية السابقة.

هدايا تذكار

تقدر تحفر المنتج مع تذكار وتبعته هدية لحد تاني. والهدايا بتتدفع مقدم، فاللي هيستلم مش هيدفع حاجة، ومفيش أي مبلغ بيظهر على البوليصة.

ازاي بتوصل

1. بتكتبلنا عنوانين: عنوان اللي هيستلم الهدية، وعنوانك انت كعنوان احتياطي.
2. بنأكد الطلب معاك، وبنطلب منك تبلغ اللي هيستلم ان فيه طلب جاي له من صني ستورز.
3. وبعدها بنكلمه احنا كمان، ونقوله ان فيه هدية جاية له منك، وهي ايه.

عارفين ان المفاجأة حلوة، بس من خبرتنا ناس كتير بترفض تستلم طلب ماطلبتهوش. عشان كده لازم اللي هيستلم يعرف قبل ما المندوب يوصله.

لو الهدية ماتسلمتش

لو اللي هيستلم رفض، او المندوب ماعرفش يوصله، الهدية بترجعلنا، وبنكلمك ونبعتها على عنوانك انت.

ومصاريف الشحنة اللي راحت ورجعت بتبقى مرة ونص مصاريف الشحن العادية لمنطقتك، حتى لو طلبك كان شحنه مجاني. وبتدفعها عند استلام الشحنة التانية. مثلا: لو الشحن لمنطقتك 80 جنيه، هتدفع 120 جنيه.

لو عايز تسترد فلوسك

لو طلبت ترجع الهدية بدل ما نبعتهالك، او الشحنة التانية ماتسلمتش ومعرفناش نوصلك، بنحتفظ بالمنتج عندنا أسبوع على الأقل، وتقدر تكلمنا فيه ونبعتهولك. وبعدها بنرجعلك فلوسك، ناقص:

• مرة ونص مصاريف الشحن العادية لمنطقتك.
• 200 جنيه، لان المنتج محفور باسم ومينفعش يتباع لحد تاني.

لو اكتشفت مشكلة بعد الاستلام

كل الخطوات موجودة في سياسة الاسترجاع والضمان.

تتبع الطلب

بيوصلك رقم الشحنة على واتساب أول ما الطلب يخرج، وتقدر تتابعه منه.

محتاج مساعدة؟

كلمنا على واتساب 01001095554، او ابعتلنا على hi@sunnyeg.com.